പരീക്ഷ കഴിഞ്ഞ് വീട്ടിലേക്ക് പോവുകയായിരുന്ന ഒൻപതാംക്ലാസുകാരൻ കാറിടിച്ച് മരിച്ചു
പരീക്ഷ കഴിഞ്ഞ് വീട്ടിലേക്ക് മടങ്ങുകയായിരുന്ന ഒൻപതാംക്ലാസുകാരൻ കാറിടിച്ച് മരിച്ചു. മൂഡബിദ്രി പടുമർനാട് അച്ചരക്കാട്ടെ സ്വദേശി രവിയുടെ മകൻ ആദിത്യ(13)യാണ് മരിച്ചത്. മൂഡബിദ്രി ജെയിൻ ഹൈസ്കൂ‌ളിലെ വിദ്യാർഥിയായിരുന്നു. വ്യാഴാഴ്‌ച ഉച്ചയ്ക്ക് പരീക്ഷ കഴിഞ്ഞ് ആദിത്യ കൂട്ടുകാരോടൊപ്പം വീട്ടിലേക്ക് പോവുകയായിരുന്നു. ബന്നഡ്‌കയിൽ ബസിറങ്ങി റോഡ് മുറിച്ചുകടക്കുന്നതിനിടെ അമിതവേഗതയിലെത്തിയ കാർ വിദ്യാർഥിയെ ഇടിച്ചു തെറിപ്പിക്കുകയായിരുന്നു. ഇടിയുടെ ആഘാതത്തിൽ ആദിത്യ റോഡരികിലെ ഓടയിലേക്കാണ് തെറിച്ചുവീണത്. കാറിലുണ്ടായിരുന്നവർ ഉടൻ ആശുപത്രിയിലെത്തിച്ചെങ്കിലും മരിച്ചിരുന്നു. മൂഡബിദ്രി പൊലീസ് സംഭവസ്ഥലത്തെത്തി.
