കാണാതായ ചെമ്മനാട് യുവാവിനെ കണ്ടെത്താൻ മുങ്ങൽ വിദഗ്‌ധൻ ഈശ്വർ മൽപെ കീഴൂരിലെത്തി.
കാസർകോട്: ചൂണ്ടയിടുന്നതിനിടയിൽ കാണാതായ ചെമ്മനാട്, കല്ലുവളപ്പിലെ കെ. മുഹമ്മദ് റിയാസി(36)നെ കണ്ടെത്താൻ മുങ്ങൽ വിദഗ്‌ധൻ ഈശ്വർ മൽപെ കീഴൂരിലെത്തി. ബുധനാഴ്‌ച ഉച്ചക്ക് 12 മണിയോടെയാണ് അദ്ദേഹം കീഴൂരിൽ എത്തിയത്. മഞ്ചേശ്വരം എം.എൽ.എ എ.കെ.എം അഷ്റഫിൻ്റെ അഭ്യർത്ഥന പ്രകാരമാണ് മൽപെ തെരച്ചിലിനായി എത്തിയത്. ഇക്കഴിഞ്ഞ ശനിയാഴ്‌ച പുലർച്ചെ കീഴൂർ, ഹാർബറിൽ ചൂണ്ടയിടാൻ പോയതായിരുന്നു റിയാസ്. പിന്നീട് കാണാതായി. നാലു ദിവസം തിരച്ചിൽ നടത്തിയിട്ടും കണ്ടെത്താൻ കഴിയാത്തത് വലിയ പ്രതിഷേധങ്ങൾക്കിടയാക്കിയിട്ടുണ്ട്. ഇത് കണക്കിലെടുത്താണ് മുങ്ങൽ വിദഗ്‌ധൻ്റെ സഹായം തേടിയത്. മൽപ്പെ എത്തിയ വിവരമറിഞ്ഞ് നിരവധി പേർ സ്ഥലത്തെത്തിയിട്ടുണ്ട്.
