ട്രെയിൻ കയറി നാടുവിട്ട മൂന്നു വിദ്യാർത്ഥികളെ കാസർകോട്ട് പിടികൂടി; ബന്ധുക്കളെത്തി നാട്ടിലേക്ക് കൂട്ടിക്കൊണ്ടു പോയി
കാസർകോട്: ക്ലാസ് കഴിഞ്ഞ ശേഷം വീട്ടിലേക്ക് പോകാതെ ട്രെയിൻ കയറി. നാടുവിട്ട പത്താംക്ലാസ് വിദ്യാർത്ഥികളായ മൂന്നു പേരെ കാസർകോട്ട് പിടികൂടി. പിന്നീട് ബന്ധുക്കളെത്തി ഇവരെ നാട്ടിലേക്ക് കൂട്ടിക്കൊണ്ടു പോയി. കണ്ണൂർ, ചൊക്ലി, കരിയാട് സ്വദേശികളായ മൂന്നുപേരാണ് പിടിയിലായത്. ചൊവ്വാഴ്‌ച വൈകിട്ട് ബംഗ്ളൂരുവിലേക്ക് പോവുകയായിരുന്ന ട്രെയിനിലാണ് സംശയകരമായ സാഹചര്യത്തിൽ മൂന്നു കുട്ടികളെ കണ്ടെത്തിയത്. സ്‌കൂൾ യൂണിഫോമിലായിരുന്നു കുട്ടികൾ. ട്രെയിൻ കാസർകോട്ടെത്തിയപ്പോൾ സംശയം തോന്നിയ റെയിൽവെ പൊലീസ് അന്വേഷിച്ചപ്പോഴാണ് സംഭവം വ്യക്തമായതെന്നു അധികൃതർ പറഞ്ഞു.
