സിനിമയ്ക്ക് റിവ്യൂ എഴുതിയാൽ വൻ പ്രതിഫലം; ഓൺലൈൻ തട്ടിപ്പിൽ നഷ്ടമായത് 46 ലക്ഷം, നാല് പേർ പിടിയിൽ
തൃശ്ശൂര്‍: ഓണ്‍ലൈന്‍ ട്രേഡിങ്ങിന്റെ പേരില്‍ കയ്പമംഗലം മൂന്നുപീടിക സ്വദേശിയിയില്‍നിന്ന് 46 ലക്ഷം രൂപ തട്ടിയെടുത്ത സംഘത്തിലെ നാലുപേരെ പോലീസ് അറസ്റ്റ് ചെയ്തു. കൊല്ലം കടക്കല്‍ സ്വദേശി അബ്ദുള്‍ അയൂബ് (25), മാടത്തറ സ്വദേശികളായ ഷിനാജ് (25), അസ്ലം (21), തിരുവനന്തപുരം ആനാട് സ്വദേശി ഷഫീര്‍ (29) എന്നിവരാണ് പിടിയിലായത്.
പ്ലക്‌സ് സിനിമ റിവ്യൂ എന്ന പേരിലുള്ള ഓണ്‍ലൈന്‍ ആപ്പ് വഴിയാണ് പ്രതികള്‍ തട്ടിപ്പ് നടത്തിയത്. ആപ്പ് വഴി സിനിമകള്‍ക്ക് റിവ്യൂ എഴുതിനല്‍കിയാല്‍ വന്‍ തുക പ്രതിഫലം വാഗ്ദാനം ചെയ്തായിരുന്നു തട്ടിപ്പ്.
കയ്പമംഗലം സ്വദേശിക്ക് ആദ്യം ചെറിയ പ്രതിഫലം കിട്ടിയെങ്കിലും പിന്നീട് ആപ്പ് വഴി ഓൺലൈൻ ട്രേഡിങ്ങിൽ നിക്ഷേപം നടത്തിയാല്‍ കൂടുതല്‍ തുക നേടാം എന്ന വാഗ്ദാനം ലഭിച്ചതോടെയാണ് പരാതിക്കാരന്‍ പല തവണയായി 46 ലക്ഷം നിക്ഷേപിച്ചത്. എന്നാല്‍, പണം തിരികെ ലഭിക്കാതെ വന്നപ്പോഴാണ് തട്ടിപ്പ് പുറത്തായത്.
പല സ്ഥലങ്ങളില്‍നിന്നായാണ് കയ്പമംഗലം സി.ഐ. ഷാജഹാന്‍, എസ്.ഐ. സൂരജ് എന്നിവരുടെ നേതൃത്വത്തില്‍ പ്രതികളെ പിടികൂടിയത്. മറ്റുള്ളവരുടെ നിരവധി ബാങ്ക് അക്കൗണ്ടുകള്‍ വാടകയ്‌ക്കെടുത്താണ് സംഘം തട്ടിപ്പ് നടത്തിയിരുന്നതെന്ന് പോലീസ് പറഞ്ഞു. അന്വേഷണത്തില്‍ കണ്ടെത്തിയ ഇത്തരത്തിലുള്ള ചില അക്കൗണ്ടുകള്‍ പോലീസ് മരവിപ്പിച്ചിട്ടുണ്ട്.
