കുവൈത്തിലെ ഫ്ലാറ്റില്‍ തീപ്പിടിത്തം;നാലംഗ മലയാളി കുടുംബത്തിന് ദാരുണാന്ത്യം
ആലപ്പുഴ തലവടി നീരേറ്റുപുറം സ്വദേശികളായ മുളയ്ക്കല്‍ മാത്യൂസ് (40), ഭാര്യ ലിനി എബ്രഹാം (38), മക്കളായ ഐറിന് (14), ഐസക് (9) എന്നിവരാണ് മരിച്ചത്.
നാട്ടില്‍ അവധിക്ക് പോയിരുന്ന കുടുംബം വെള്ളിയാഴ്ച വൈകീട്ടോടെയാണ് ഫ്ളാറ്റില്‍ തിരിച്ചെത്തിയത്. യാത്രാക്ഷീണത്തെത്തുടർന്ന നേരത്തെ ഉറങ്ങാൻ കിടന്നിരുന്നുവെന്നാണ് സൂചന. ഇതിനിടെ രാത്രി 9 മണിയോടെ ആയിരുന്നു അപകടം സംഭവിച്ചത്.
എ.സിയിലെ വൈദ്യുതി തകരാറാണ് അപകട കാരണമെന്നാണ് പ്രാഥമിക വിവരം. വിഷപ്പുക ശ്വസിച്ചാണ് മരണമെന്നും സൂചനയുണ്ട്. അഗ്നിരക്ഷാസേനയും പോലീസും സ്ഥലത്തെത്തിയാണ് തുടർനടപടി സ്വീകരിച്ചത്. അന്വേഷണം ആരംഭിച്ചതായി പോലീസ് അറിയിച്ചു.
