ന്യൂഡല്ഹി: ജമ്മുകശ്മീരിന്റെ പ്രത്യേക പദവി റദ്ദാക്കിയതിനെതിരായ ഹര്ജികള് അഞ്ചംഗ ഭരണഘടനാ ബെഞ്ച്തന്നെ പരിഗണിക്കും. ജസ്റ്റിസ് എം.വി രമണ അധ്യക്ഷനായ ബെഞ്ചിന്റേതാണ് വിധി.
1959ലെ പ്രേംനാഥ് കൗള് കേസിലും അതുപോലെതന്നെ 1970ലെ സമ്പത് പ്രകാശ് കേസിലും ഭരണഘടനയുടെ 370-ാം അനുഛേദ പ്രകാരം പ്രഖ്യാപിച്ച വിധികള് തമ്മില് വൈരുദ്ധ്യങ്ങള് ഉണ്ടെന്നും അതിനാല് 370-ാം വകുപ്പ് ദുര്ബലപ്പെടുത്തിയതിനെതിരായ ഹര്ജികള് വിശാല ബെഞ്ചിന് വിടണമെന്നുമാണ് ഹര്ജിക്കാര് ആവശ്യപ്പെട്ടിരുന്നത്. എന്നാല് 1959ലെയും 1970ലെയും വിധികള് തമ്മില് വൈരുദ്ധ്യമില്ലെന്നാണ് ജസ്റ്റിസ് എം.വി. രമണയുടെ അധ്യക്ഷതയിലുള്ള അഞ്ചംഗ ഭരണഘടനാ ബെഞ്ച് വ്യക്തമാക്കിയിരിക്കുന്നത്.
നേരത്തെ ഹര്ജികള് വിശാല ബെഞ്ചിന് വിടണമെന്ന ഹര്ജിക്കാരുടെ ആവശ്യം കേന്ദ്രസര്ക്കാര് സുപ്രീംകോടതിയില് എടുത്തിരുന്നു. 1959ലെയും 1970ലെയും വിധിയില് 370-ാം വകുപ്പില് തീരുമാനമെടുക്കാനുള്ള അധികാരം രാഷ്ട്രപതിക്കുണ്ട് എന്നകാര്യം വ്യക്തമാക്കിയിട്ടുണ്ടെന്ന് ജസ്റ്റിസ് എം.വി രമണയുടെ അധ്യക്ഷതയിലുള്ള ഭരണഘടനാ ബെഞ്ച് വാക്കാല് നിരീക്ഷിച്ചു. 370-ാം വകുപ്പ് ദുര്ബലപ്പെടുത്തിയതിനെതിരായ ഹര്ജിക അഞ്ചംഗ ഭരണഘടനാ ബെഞ്ച് പരിഗണിക്കുമെങ്കിലും അവ എപ്പോഴാകുമെന്ന് കോടതി വിശദീകരിച്ചിട്ടില്ല.