അപകടത്തിൽ പരിക്കേറ്റ് ചികിൽസയിൽ കഴിഞ്ഞത് നാലുമാസം; ഷഫീഖിന്റെ മരണം നാടിനെ കണ്ണീരിലാഴ്ത്തി
കാസർകോട്: ബൈക്ക് അപകടത്തിൽ ഗുരുതരമായി പരിക്കേറ്റ് ചികിത്സയിലായിരുന്ന യുവാവിന്റെ മരണം നാടിനെ കണ്ണീരിലാഴ്ത്തി. ചെങ്കള, തൈവളപ്പിലെ സി.വി ഷഫീഖ് (22)ആണ് മരിച്ചത്. 2023 ഡിസംബർ 17ന് എറണാകുളത്തുണ്ടായ വാഹനാപകടത്തിലാണ് ഷെഫീഖിന് പരിക്കേറ്റത്. എറണാകുളത്ത് ഹോട്ടൽ ജീവനക്കാരനായിരുന്നു. ജോലി സ്ഥലത്ത് നിന്ന് താമസസ്ഥലത്തേക്ക് പോകുന്നതിനിടയിൽ ഷഫീഖ് സഞ്ചരിച്ചിരുന്ന ബൈക്ക് മറ്റൊരു ബൈക്കുമായി കൂട്ടിയിടിച്ചാണ് അപകടമുണ്ടായത്. അപകടത്തെത്തുടർന്ന് ചലനശേഷിയും ബോധവും നഷ്ടമായതിനാൽ ഒരു മാസക്കാലം എറണാകുളത്തെ സ്വകാര്യ ആശുപത്രിയിൽ ചികിത്സയിലായിരുന്നു. പിന്നീട് കാസർകോട്ടെ ആശുപത്രിയിലേക്ക് മാറ്റി. സി.വി അബൂബക്കർ- ഖദീജ ദമ്പതികളുടെ മകനാണ്. സഹോദരങ്ങൾ: അബ്ദുൽ സലാം, അബ്ദുൽ കലാം. നിസാമുദ്ദീൻ, പരേതനായ മുഹമ്മദ് നിയാസ്.
