കണ്ണൂരിൽ വാഹനാപകടത്തിൽ മഹല്ല് ഖത്തീബ് മരിച്ചു
കണ്ണൂർ: പേരാവൂരിൽ വാഹനാപകടത്തിൽ ഖത്തീബ് മരിച്ചു. മുരിങ്ങോടി മഹല്ല് ഖത്തീബ് മുസമ്മിൽ ഫൈസി ഇർഫാനി (34) യാണ് മരിച്ചത്. തില്ലങ്കേരി കാവുമ്പടിക്ക് സമീപം ചൊവ്വാഴ്ച രാവിലെയായിരുന്നു അപകടം. അദ്ദേഹം സഞ്ചരിച്ച സ്കൂട്ടർ എതിർദിശയിൽ നിന്ന് വന്ന ടാക്സി ഓട്ടോയുമായി കൂട്ടിയിടിക്കുകയായിരുന്നു.
വേങ്ങാട് ഊർപ്പള്ളിയിലെ ഭാര്യ വീട്ടിൽ നിന്ന് മുരിങ്ങോടിയിലേക്ക് വരുന്നതിനിടെയാണ് അപകടം സംഭവിച്ചത്. മട്ടന്നൂരിലെ സ്വകാര്യാ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. അപകടത്തിൽ ഓട്ടോലുണ്ടായിരുന്ന ദമ്പതികൾക്ക് പരിക്കേറ്റിട്ടുണ്ട്.
കണ്ണൂർ ചെറുകുന്ന് മാക്കുന്ന് സ്വദേശിയായ മുസമ്മിൽ ഇർഫാനി കണ്ണാടിപ്പറമ്പ് ജുമാ മസ്ജിദിലാണ് ആദ്യം ഖത്തീബായി ജോലിയിൽ പ്രവേശിച്ചത്. 2022 മുതൽ മുരിങ്ങോടി മഹല്ലിൽ ഖത്തീബാണ്. മാക്കുന്ന് ദാറുൽ അബ്റാറിൽ ഇബ്രാഹിം മുസ്ലിയാരുടെ മകനാണ്. മാതാവ്: ആയിഷ, ഭാര്യ: ഖദീജ(ഊർപ്പള്ളി), മകൻ: മുജ്ത്തബ(രണ്ടു വയസ്), സഹോദരങ്ങൾ: മഷൂദ്, മുബഷിർ, മുഹ്സിൻ. കബറടക്കം പിന്നീട്.
