ബെെക്ക് സ്കൂൾ ബസിലിടിച്ച് അപകടം; പത്താം ക്ലാസ് വിദ്യാർത്ഥിക്ക് ദാരുണാന്ത്യം
മലപ്പുറം: സ്കൂൾ ബസിന് പിറകിൽ ബെെക്കിടിച്ച് ഗുരുതരമായി പരിക്കേറ്റ പത്താം ക്ലാസ് വിദ്യാർത്ഥി മരിച്ചു. മലപ്പുറം കൊണ്ടോട്ടി അരിമ്പ്ര മിനി ഊട്ടിയിലാണ് സംഭവം. വേങ്ങര കിളിനക്കോട് വില്ലൻ വീട്ടിൽ സിനാൻ (16) ആണ് മരിച്ചത്. കൂടെയുണ്ടായിരുന്ന സുഹൃത്ത് കിളിനക്കോട് സ്വദേശി കെ ടി സനീജ് കോഴിക്കോട്ടെ സ്വകാര്യ ആശുപത്രിയിൽ ചികിത്സയിലാണ്. സിനാൻ ചേറൂർ സ്കൂളിലെ വിദ്യാർത്ഥിയായിരുന്നു. ഇന്നലെ വെെകുന്നേരം അഞ്ച് മണിയോടെയായിരുന്നു അപകടം ഉണ്ടായത്.
മിനി ഊട്ടിയിൽ നിന്ന് കൊണ്ടോട്ടി ഭാഗത്തേക്ക് വരുമ്പോൾ നിയന്ത്രണം വിട്ട ബെെക്ക് ബസിന്റെ പിറകിൽ ഇടിക്കുകയായിരുന്നു. സ്കൂൾ വിദ്യാർത്ഥികളെ ഇറക്കാൻ നിർത്തിയിട്ടിരിക്കുകയായിരുന്നു ബസ്. പരിക്കേറ്റ ഇരുവരെയും നാട്ടുകാർ ഉടൻ കൊണ്ടോട്ടിയിലെ സ്വകാര്യ ആശുപത്രിയിൽ എത്തിച്ചു. പിന്നീട് ഇവരെ കോഴിക്കോട്ടെ സ്വകാര്യ ആശുപത്രിയിലേക്ക് മാറ്റി. ഗുരുതരമായി പരിക്കേറ്റ സിനാൻ ചികിത്സയിലിരിക്കെയാണ് മരിച്ചത്. അപകടം സംബന്ധിച്ച് കൂടുതൽ അന്വേഷണം നടത്തിവരികയാണെന്ന് പൊലീസ് അറിയിച്ചു.
