നിരവധി ഇടങ്ങളിൽ മനോരോഗിയുടെ പരാക്രമം; സ്കൂട്ടർ കയറ്റി വഴിയാത്രക്കാരനെ കൊല്ലാൻ ശ്രമം; ഒടുവിൽ പൊലീസും നാട്ടുകാരും ചേർന്ന് കീഴ്പ്പെടുത്തി .
കാസർകോട്: മനോരോഗിയുടെ പരാക്രമത്തിൽ രണ്ടു പേർക്ക് പരിക്ക്. സംഭവത്തിൽ നരഹത്യാശ്രമത്തിനു കേസെടുത്ത പൊലീസ് അക്രമിയെ കോഴിക്കോട്ടെ മാനസികാരോഗ്യ കേന്ദ്രത്തിലേയ്ക്ക് മാറ്റി. കഴിഞ്ഞ ദിവസം തളങ്കരയിലും പൊവ്വൽ, മാസ്തിക്കുണ്ടിലുമാണ് അക്രമം അരങ്ങേറിയത്. പുലർച്ചെ മൂന്നു മണിയോടെ മാലിക് ദീനാർ നഗറിൽ ഒരാളെ ആക്രമിച്ചിരുന്നു. ഇതിനുശേഷം സ്കൂ‌ട്ടറിൽ മാസ്തിക്കുണ്ടിൽ എത്തിയ യുവാവ് വഴിയാത്രക്കാരനെ തള്ളിയിട്ടു. തുടർന്ന് സ്കൂട്ടർ കയറ്റി കൊല്ലാൻ ശ്രമിക്കുകയായിരുന്നുവെന്നു പറയുന്നു. രക്ഷപ്പെടാൻ ശ്രമിക്കുന്നതിനിടയിൽ മാസ്തിക്കുണ്ടിലെ ക്വാർട്ടേഴ്സിലെ താമസക്കാരനുമായ ഇബ്രാഹിമിന്റെ ദേഹത്തു സ്കൂട്ടർ കയറിയിറങ്ങി തുടയെല്ലു പൊട്ടി. ഇയാളെ ആശുപത്രിയിൽ പ്രവേശിപ്പിച്ചു. പിന്നീട് കാസർകോട്ട് എത്തിയ യുവാവ് വീണ്ടും അക്രമത്തിനു ശ്രമിച്ചതോടെ പൊലീസും നാട്ടുകാരും ചേർന്ന് കീഴ്പ്പെടുത്തി ആശുപത്രിയിലെത്തിച്ചു യുവാവ് അവിടെയും അക്രമത്തിനു ശ്രമിച്ചുവത്രെ. തുടർന്ന് മരുന്നു നൽകി ശാന്തനാക്കി. പിന്നീട് ഡിവൈ.എസ്.പിയുടെ നിർദ്ദേശ പ്രകാരം ആരോഗ്യ പ്രവർത്തകരുടെ സഹായത്തോടെ കുതിരവട്ടത്തേയ്ക്ക് കൊണ്ടുപോവുകയായിരുന്നു. കാസർകോട്, ആദൂർ പൊലീസ് സ്റ്റേഷനുകളിൽ അക്രമം നടത്തിയതിന് യുവാവിനെതിരെ നിലവിൽ കേസുകളുണ്ടെന്ന് പൊലീസ് പറഞ്ഞു.
