ബന്തടുക്കയിൽ കെ.എസ്.ആർ.ടി.സി ബസ് ബൈക്കിലിടിച്ച് പെയിന്റിങ് തൊഴിലാളിക്ക് ദാരുണാന്ത്യം
കാസർകോട്: കെ.എസ്.ആർ.ടി.സി ബസ് ബൈക്കിലിടിച്ച് പെയിന്റിങ് തൊഴിലാളിക്ക് ദാരുണാന്ത്യം. ചിറ്റാരിക്കാൽ സ്വദേശിയും ചൂരിത്തോട് ക്വാട്ടേഴ്‌സിൽ താമസക്കാരനുമായ സജി ജോസ് കുഴിപ്പറമ്പിൽ(44) ആണ് മരിച്ചത്. ഞായറാഴ്ച രാത്രി പത്തോടെ ബന്തടുക്ക. ഏണിയാടി വളവിലാണ് അപകടം. കാസർകോട് നിന്ന് വരികയായിരുന്ന ബസ് ജോലികഴിഞ്ഞ് താമസ സ്ഥലത്തേക്ക് പോവുകയായിരുന്ന സജിയുടെ ബൈക്കിടിക്കുകയായിരുന്നു. റോഡിലേക്ക് തെറിച്ചുവീണ സജി സംഭവസ്ഥലത്തു വച്ചുതന്നെ മരിച്ചു. മൃതദേഹം ബേഡകം പൊലീസെത്തി ജില്ലാ ആശുപത്രിയിലേക്ക് മാറ്റി. അപകടത്തിൽ ബസ് ഡ്രൈവർക്കെതിരെ ബേഡകം പൊലീസ് കേസെടുത്തു. അടുത്തകാലത്തായി ക്വാട്ടേഴ്‌സിൽ താമസിച്ചുവരുന്ന സജിക്ക് ഭാര്യയും രണ്ടുകുട്ടികളുമുണ്ട്. പിതാവ് ജോസ്. മൃതദേഹം ജില്ലാ ആശുപത്രിയിൽ മോർച്ചറിയിൽ പോസ്റ്റുമോർട്ടം നടത്തി. സംസ്‌കാരം വൈകീട്ട് അഞ്ചിന് കരിവേടകം മേരിപുരം സെന്റ് ദേവാലയ സെമിത്തേരിയിൽ നടക്കും.
