കണ്ണൂരിൽ കാർ അപകടം: വിദ്യാർത്ഥി മരിച്ചു;മൂന്നു പേർക്ക് ഗുരുതര പരിക്ക്
കണ്ണൂർ: കാർ നിയന്ത്രണം വിട്ട് വിദ്യാർത്ഥി മരിച്ചു. സഹയാത്രികരായ മൂന്നു പേർക്ക് ഗുരുതരമായി പരിക്കേറ്റു. നാറാത്ത് മുച്ചിലോട്ട് കാവ് എൽ.പി സ്‌കൂളിന് സമീപത്തെ അബ്ദുൾ ഖാദർ-സമീറ ദമ്പതികളുടെ മകൻ ദാനിഷാ(17)ണ് മരിച്ചത്. ചൊവ്വാഴ്ച്ച രാത്രി എട്ടേക്കമുക്കാലോടെ നാറാത്ത് ആലിൻകീഴിലാണ് അപകടം നടന്നത്. നിയന്ത്രണം വിട്ട കാർ മറിയുകയായിരുന്നു. കാറിലുണ്ടായിരുന്ന ദാനിഷ്, സഫാൻ തുടങ്ങിയവരെ നാട്ടുകാരാണ് പുറത്തെടുത്ത് കണ്ണൂരിലെ സ്വകാര്യ ആശുപത്രിയിലെത്തിച്ചത്. എന്നാൽ അതീവഗുരുതരമായി പരിക്കേറ്റ ദാനിഷ് ചികിത്സയ്ക്കിടെ മരിച്ചു. മറ്റുളളവരുടെ പരുക്ക് സാരമുള്ളതാണെന്നാണ് മയ്യിൽ പൊലിസ് നൽകുന്ന വിവരം. മയ്യിൽ പൊലിസ് മൃതദേഹം ഇൻക്വസ്റ്റ് നടത്തി ജില്ലാ ആശുപത്രി മോർച്ചറിയിലേക്ക് മാറ്റി.
