യുവാവിനെ വീടിനകത്ത് തൂങ്ങിമരിച്ച നിലയിൽ കണ്ടെത്തി
കാസർകോട്: യുവാവിനെ വീടിനകത്ത് തൂങ്ങിമരിച്ച നിലയിൽ കണ്ടെത്തി. കൊടക്കാട് വെള്ളച്ചാൽ വൈദ്യശാലക്ക് സമീപം താമസിക്കുന്ന പുളുക്കുൽ അനൂപ് (36) ആണ് മരിച്ചത്. ബുധനാഴ്ച രാവിലെയാണ് സംഭവം. എന്നും വൈകിയാണ് ഉണർന്നെഴുന്നേൽക്കാറുള്ളത്. അതുകൊണ്ട് വീട്ടുകാർ അത്ര കാര്യമാക്കിയില്ല. വൈകിയും വാതിൽ തുറന്ന് കാണാത്തതിനെ തുടർന്ന് കിടപ്പുമുറി തുറന്നപ്പോഴാണ് തൂങ്ങിയ നിലയിൽ കണ്ടത്. ഉടൻ വീട്ടുകാർ അയൽവാസികളെ വിവരമറിയിച്ച് ആശുപത്രിയിൽ എത്തിച്ചെങ്കിലും മരിച്ചു. മൃതദേഹം പരിയാരം കണ്ണൂർ ഗവ.മെഡിക്കൽ കോളേജിലേക്ക് മാറ്റി. ചീമേനി പോലീസ് ഇൻക്വസ്റ്റ് നടത്തി. പോസ്റ്റുമോർട്ടത്തിന് ശേഷം വൈകിട്ട് നാട്ടിലെത്തിക്കും. വെള്ളച്ചാലിലെ പരേതനായ ബാലകൃഷ്ണന്റെയും നളനിയുടെയും മകനാണ്. സജ്‌നയാണ് സഹോദരി. ഡ്രൈവറായ അനൂപ് അവിവാഹിതനാണ്.
