കഞ്ചാവുമായി കാസർകോട് സ്വദേശികൾ വയനാട്ടിൽ പിടിയിൽ
സുൽത്താൻ ബത്തേരി: കാറിൽ കടത്തിയ കഞ്ചാവുമായി കാസർകോട് സ്വദേശികളായ യുവാക്കളെ പിടികൂടി. വെള്ളരിക്കുണ്ട്. പുതിയപുരയിൽ പി.പി.സിറാജ് (35), പള്ളിക്കര, കുറിച്ചിക്കുന്ന് വീട്ടിൽ ജെ. മുഹമ്മദ് റാഷിദ് (30) എന്നിവരെയാണ് സുൽത്താൻ ബത്തേരി എസ്.ഐ എൻ.എ. രാധാകൃഷ്ണന്റെ നേതൃത്വത്തിലുള്ള പൊലീസ് സംഘം അറസ്റ്റ് ചെയ്തത്. ബുധനാഴ്ച ഉച്ചയോടെ മുത്തങ്ങ പൊലീസ് ചെക്ക്പോസ്റ്റിന് സമീപം നടത്തിയ വാഹനപരിശോധനക്കിടെയാണ് യുവാക്കൾ പിടിയിലാകുന്നത്.
228 ഗ്രാം കഞ്ചാവാണ് ഇവരിൽ നിന്ന് പിടിച്ചെടുത്തത്. പ്രതികൾ സഞ്ചരിച്ച കെ.എൽ. 60 ജെ. 4853 കാറും കസ്റ്റഡിയിലെടുത്തു. സീനിയർ സി.പി.ഒ ഷൈജു, സി.പി.ഒ ശരത്ത് പ്രകാശ് എന്നിവരും സംഘത്തിലുണ്ടായിരുന്നു.
