നഗരത്തിൽ വൻ കഞ്ചാവ് വേട്ട;ലോറിയിൽ കടത്തുകയായിരുന്ന 42 കിലോ കഞ്ചാവ് പിടികൂടി
കോഴിക്കോട് : മലാപറമ്പ് സിഗ്നൽ ജംഗ്ഷനിൽ വെച്ച് ലോറിയിൽ കടത്തുകയായിരുന്ന 42 കിലോ കഞ്ചാവ് പിടികൂടി. രണ്ട് കിലോ വീതമുള്ള കവറുകളിലാക്കി കടത്തുകയായിരുന്ന കഞ്ചാവാണ് എക്സൈസ് എൻഫോഴ്സസ്മെന്റും ആന്റി നർകോട്ടിക് സ്പെഷ്യൽ സ്ക്വാഡും ചേർന്ന് പിടികൂടിയത്. ലോറി ഡ്രൈവർ നൊച്ചാട് കൽപത്തൂർ കൂരാൻ തറമ്മൽ രാജേഷിനെ പിടികൂടി. വലിയ ടാർപോളിൻ ഷീറ്റിനുള്ളിലായിരുന്നു കഞ്ചാവ് സൂക്ഷിച്ചിരുന്നത്. ഇന്നലെ പകൽ പന്ത്രണ്ടരയോടെയാണ് കഞ്ചാവ് പിടികൂടിയത്. വാഹന പരിശോധനക്കിടെ ലോറി തടഞ്ഞു നിർത്തി പരിശോധിക്കുകയായിരുന്നു. എക്സൈസ് ഇൻസ്പെക്ടർ കെ.എൻ റിമേഷിന്റെ നേതൃത്വത്തിലുള്ള സംഘമാണ് കഞ്ചാവ് പിടികൂടിയത്. പ്രതിയെയും തൊണ്ടിമുതലും ജൂഡീഷ്യൽ ഫസ്റ്റ് ക്ലാസ് മജിസ്ട്രേറ്റിന് മുമ്പാകെ ഹാജരാക്കി. പ്രിവന്റീവ് ഓഫീസർമാരായ യു.പി മനോജ് കുമാർ, പി.കെ അനിൽകുമാർ, സിവിൽ എക്സൈസ് ഓഫീസർമാരായ സന്ദീപ് എൻ.എസ്. ജിത്തു പി.പി. വിപിൻ പി. മുഹമ്മദ് അബ്ദുൽ റഊഫ്, സാവിഷ്, ജിഷ്ണു പി.കെ, ഡ്രൈവർ പ്രബീഷ് എന്നിവരായിരുന്നു സംഘത്തിലുണ്ടായിരുന്നത്.
