അന്യസംസ്ഥാനങ്ങളിൽ നിന്ന് വലിയ തോതിൽ കഞ്ചാവ് കൊണ്ടുവന്ന് വിറ്റഴിക്കുന്ന അൻവറും സംഘവും പിടിയിൽ
പാലക്കാട്: അട്ടപ്പാടിയിൽ 116 കിലോയിലധികം കഞ്ചാവ് എക്സൈസ് പിടികൂടി. സ്റ്റേറ്റ് എക്സൈസ് എൻഫോഴ്സ്മെൻറ് സ്ക്വാഡ് തലവൻ അസി.എക്സൈസ് കമ്മീഷണർ ടി..അനികുമാറിന്റെ നിർദ്ദേശാനുസരണം സ്ക്വാഡ് അംഗമായ മുഹമ്മദാലി നൽകിയ രഹസ്യ വിവരത്തിൻ്റെ അടിസ്ഥാനത്തിലാണ് മണ്ണാർക്കാട് എക്സൈസ് സർക്കിൾ ഇൻസ്പെക്ടർ എസ്.ബി ആദർശിൻ്റെ നേത്യത്വത്തിൽ വൻ കഞ്ചാവ് വേട്ട നടത്തിയത്.
കോഴിക്കോട് താമരശേരി സ്വദേശികളായ അൻവർ (33), ഷമീർ (36), അട്ടപ്പാടി സ്വദേശികളായ മുഹമ്മദ് ഹാഷിഫ് (21), ആദർശ് (19 ) എന്നിവരെ കേസുമായി ബന്ധപ്പെട്ട് അറസ്റ്റ് ചെയ്തു. ഇവർ കഞ്ചാവ് സൂക്ഷിച്ചു കടത്താൻ ഉപയോഗിച്ച വാഹനങ്ങളും എക്സൈസ് കസ്റ്റഡിയിൽ എടുത്തു. അന്യസംസ്ഥാനങ്ങളിൽ നിന്ന് വലിയ തോതിൽ കഞ്ചാവ് കൊണ്ടുവന്നു കേരളത്തിൽ വിറ്റഴിക്കുന്ന സംഘത്തിലെ പ്രധാനികളാണ് പിടിയിലായവർ. പിടിച്ചെടുത്ത കഞ്ചാവിന് മയക്കുമരുന്ന് വിപണിയിൽ ഇരുപത് ലക്ഷം രൂപയിലധികം വില വരും.ഇവരുടെ സംഘത്തിലെ മറ്റുള്ളവരെക്കുറിച്ചും തുടരന്വേഷണം ഉണ്ടാകും.
