മംഗൽപ്പാടി താലൂക്ക് ആശുപത്രിയിൽ രാത്രിചികിത്സയ്ക്ക് സൗകര്യമൊരുക്കും – ആരോഗ്യമന്ത്രി
ഉപ്പള: മംഗൽപ്പാടി താലൂക്ക് ആശുപത്രിയിൽ രാത്രിചികിത്സയ്ക്ക് സൗകര്യമൊരുക്കുമെന്ന് മന്ത്രി വീണാ ജോർജ് ഉറപ്പുനൽകി. അത്യാഹിതവിഭാഗം തുടരുന്നതിനുള്ള നടപടികളുണ്ടാകും. മറ്റു ജില്ലകളിൽനിന്ന് ഇവിടെയെത്തുന്ന ഡോക്ടർമാർ പെട്ടെന്ന് സ്ഥലംമാറി പോകുന്നതിനു പരിഹാരമെന്ന നിലയിൽ സ്റ്റാഫ് ക്വാർട്ടേഴ്സുകൾ നിർമിക്കും.
തുടർപഠനത്തിനു അവധിയെടുക്കുന്നത് പതിവായതിനാൽ പി.ജി. കഴിഞ്ഞ ഡോക്ടർമാരെ നിയമിക്കും. കർണാടക രജിസ്ട്രേഷനുള്ള ഡോക്ടർമാരുടെ സേവനം ഉപയോഗപ്പെടുത്താൻ സൗകര്യമുണ്ടാക്കണമെന്ന് എ.കെ.എം.അഷ്റഫ് എം.എൽ.എ. ശ്രദ്ധയിൽപ്പെടുത്തിയപ്പോൾ അതിനു നിയമഭേദഗതി വേണമെന്നായിരുന്നു മന്ത്രിയുടെ മറുപടി.