വള്ളാമ്പള്ളി റിസോർട്ടിനു സമീപത്തു പുലിയിറങ്ങിയതായി സംശയം; വനം വകുപ്പ് പരിശോധന നടത്തി
കാസർകോട്: പരപ്പ ബളാൽ പഞ്ചായത്തിലെ പള്ളത്തുമല, വള്ളാമ്പള്ളി റിസോർട്ടിനു സമീപത്തു പുലിയിറങ്ങിയതായി സംശയം. പുലിയുടേതെന്നു കരുതുന്ന കാൽപ്പാടുകൾ കണ്ട നാട്ടുകാർ വനം വകുപ്പ് അധികൃതരെ വിവരം അറിയിച്ചു. വനം വകുപ്പ് ഉദ്യോഗസ്ഥർ സ്ഥലത്തെത്തി അന്വേഷണം തുടങ്ങി.പ്രദേശത്ത് നേരത്തെയും പുലിയുടെ ശല്യം ഉണ്ടായിരുന്നതായി നാട്ടുകാർ പറഞ്ഞു. ഏതാനും വർഷം മുൻപ് സമീപ പ്രദേശമായ ഓണിയിൽ പുലി കെണിയിൽ കുടുങ്ങിയിരുന്നു. ഈ പുലിയെ മയക്കുവെടിവച്ചപ്പോൾ ചത്തുപോയിരുന്നു.പുലിയെ പിടികൂടാൻ കൂട് സ്ഥാപിക്കാൻ നടപടി വേണമെന്ന് നാട്ടുകാർ ആവശ്യപ്പെട്ടു.
