കഞ്ചാവ് വിറ്റിട്ട് വലിയ കാര്യമില്ല..! എംഡിഎംഎ വില്‍പ്പനയാണ് നല്ലത്… ഒടുവില്‍ യുവാക്കള്‍ക്ക് പിടിവീണു
കായംകുളം: കായംകുളത്ത് 48 ഗ്രാം എംഡിഎംഎയുമായി യുവാക്കള്‍ പിടിയില്‍. കായംകുളം റെയില്‍വേ സ്റ്റേഷന് സമീപത്തു നിന്നാണ് മൂന്ന് യുവാക്കളെ കായംകുളം പൊലീസും ജില്ലാ ഡാന്‍സാഫ് സംഘവും നടത്തിയ പരിശോധനയില്‍ പിടികൂടിയത്. കാര്‍ത്തികപ്പള്ളി മഹാദേവികാട് കുന്തളശ്ശേരി തെക്കേതില്‍ ഉണ്ണിക്കുട്ടന്‍ (26), കൊച്ചുപടനയില്‍ സച്ചിന്‍ (23), മിലന്‍ എന്നിവരാണ് പിടിയിലായത്. കഞ്ചാവ് കച്ചവടം നടത്തിയിരുന്ന ഇവര്‍ കൂടുതല്‍ പണം കണ്ടെത്തുന്നതിനായാണ് ന്യൂജെന്‍ ലഹരി കച്ചവടത്തിലേയ്ക്ക് തിരിഞ്ഞതെന്ന് പൊലീസിനോട് പറഞ്ഞു.
കാര്‍ത്തികപ്പള്ളി, മുതുകുളം, ചിങ്ങോലി ഭാഗത്ത് ചെറുപ്പക്കാര്‍ക്കും കുട്ടികള്‍ക്കും മയക്കുമരുന്ന് എത്തിച്ചു കൊടുക്കുന്നത് ഇവരാണെന്നും ഇവരുടെ വീട്ടില്‍ നിന്ന് കുട്ടികളും ചെറുപ്പക്കാരും മയക്കുമരുന്ന് വാങ്ങുന്നതായി പരാതിയുണ്ടെന്നും പൊലീസ് വ്യക്തമാക്കി. ബെംഗളൂരുവില്‍ നിന്ന് മയക്കുമരുന്ന് നേരിട്ട് വാങ്ങി കായംകുളം, ഹരിപ്പാട്, തൃക്കുന്നപ്പുഴ മേഖലകളില്‍ വില്‍ക്കാന്‍ കൊണ്ടുവന്നതാണെന്ന് ഇവര്‍ ചോദ്യം ചെയ്യലില്‍ പൊലീസിനോട് പറഞ്ഞു.
