വിദ്യാര്‍ത്ഥിക്ക് നേരെ ആക്രമണം; കണ്ണൂരില്‍ ആയുധങ്ങളുമായി രണ്ട് പേര്‍ പിടിയില്‍
കണ്ണൂര്‍: മട്ടന്നൂരില്‍ വിദ്യാര്‍ത്ഥിയെ ആക്രമിക്കാന്‍ ശ്രമിച്ച രണ്ട് പേരെ പൊലീസ് പിടികൂടി. നെല്ലൂന്നി സ്വദേശി എം.വി വൈശാഖ്, പെരിഞ്ചേരി സ്വദേശി വി. ജോതിഷ് എന്നിവരെയാണ് മട്ടന്നൂര്‍ പൊലീസ് അറസ്റ്റ് ചെയ്തത്. ഇവരില്‍ നിന്ന് ആയുധങ്ങളും കണ്ടെടുത്തു. കഴിഞ്ഞ ഒമ്പതിന് വൈകീട്ട് നെല്ലൂന്നി വാവോട്ടുപാറ റോഡില്‍ വച്ചാണ് വിദ്യാര്‍ഥിയായ അജ്മലിനെ സംഘം ആക്രമിച്ചത്. കോളജ് വിട്ട് ബൈക്കില്‍ വീട്ടിലേക്ക് പോവുമ്പോള്‍ മറ്റൊരു ബൈക്കിലെത്തി മൂന്നംഗ സംഘം ആക്രമിക്കുകയായിരുന്നു. ബൈക്കില്‍ നിന്ന് ചവിട്ടിത്താഴെയിട്ട സംഘം കൈയിലിരുന്ന ആയുധങ്ങള്‍ ഉപയോഗിച്ച് ആക്രമിക്കുകയും ചെയ്തു. ഇതോടെ അടുത്ത വീട്ടിലേക്ക് ഓടിക്കയറിയ അജ്മലിന് കാലിന് പരിക്കേല്‍ക്കുകയും കണ്ണൂരിലെ സ്വകാര്യ ആശുപത്രിയില്‍ ചികിത്സ തേടുകയും ചെയ്തു. തുടര്‍ന്ന് അജ്മലിന്റെ പരാതിയില്‍ മട്ടന്നൂര്‍ പൊലീസ് കേസെടുത്ത് അന്വേഷണം നടത്തുന്നതിനിടെയാണ് രണ്ട് പേര്‍ പിടിയിലായത്. നെല്ലൂന്നിയില്‍ ഒളിവില്‍ കഴിയുന്നതിനിടെയാണ് ഇരുവരും പിടിയിലായത്. ഇവരുടെ ബൈക്കും കസ്റ്റഡിയിലെടുത്തു. ചോദ്യം ചെയ്യലിനിടെ, തെറ്റിദ്ധരിപ്പിക്കുന്ന രീതിയില്‍ ആയുധം ഒളിപ്പിച്ച സ്ഥലം പറഞ്ഞ് പൊലീസിനെ ഇവര്‍ കുഴപ്പിക്കുകയും ചെയ്തു. വൈശാഖിനെ വീണ്ടും ചോദ്യം ചെയ്തപ്പോഴാണ് മറ്റൊരു പ്രതിയായ ജ്യോതിഷിന്റെ വീടിന് സമീപം തുണിയില്‍ ഒളിപ്പിച്ച നിലയില്‍ വടിവാളും ഇരുമ്പ് പൈപ്പും കണ്ടെത്തിയത്. മുന്‍വൈരാഗ്യമാണ് ആക്രമണത്തിന് കാരണമെന്ന് പൊലീസ് പറയുന്നു. സംഭവത്തില്‍ ഒരാള്‍ കൂടി പിടിയിലാവാനുണ്ട്. പ്രതികളെ രാത്രിയോടെ മട്ടന്നൂര്‍ കോടതിയില്‍ ഹാജരാക്കും.
