മാനന്തവാടി: മീനങ്ങാടിയില്‍ നടന്ന അഖില കേരള കിഡ്‌സ് അണ്ടര്‍ 9 ഫൈവ്‌സ് ഫുട്‌ബോള്‍ ടൂര്‍ണമെന്റിന്റെ ഫൈനലിൽ കെ എഫ് ടി സിയുടെ പികെ ഡാനിഷ് കോര്‍ണര്‍ കിക്കെടുക്കാന്‍ വരുന്നു. സെറ്റ് പീസിന്റെ ആശാനായി മാറിക്കൊണ്ടിരിക്കുന്ന മകനില്‍ നിന്ന് അവന്റെ ബാപ്പ അബു ഹാഷിം ഒരത്ഭുതം പ്രതീക്ഷിച്ചിരുന്നു. കാരണം അവന്റെ ഓരോ ചുവടും കുഞ്ഞുനാള്‍ മുതല്‍ അറിയുന്ന ഹാഷിമിന് അറിയാമായിരുന്നു ഈ കിക്കിലവനൊരു മാജിക് ഒളിപ്പിച്ചു കടത്തുമെന്ന്. അതുകൊണ്ടു തന്നെ മൊബൈലില്‍ ആ കിക്ക് ഹാഷിം പകര്‍ത്തി. ഇല്ലായിരുന്നെങ്കില്‍ ഇന്ന് ഏറെ വൈറലായിരിക്കുന്ന ഡാനിഷിന്റെ മനോഹരമായ ഡയറക്ട് കോര്‍ണര്‍ കിക്ക് ഗോള്‍ നമുക്ക് കാണുവാന്‍ സാധിക്കില്ലായിരുന്നു. മത്സരം ഡാനിയുടെ ടീം 4 – 2 ന് ജയിച്ച് കപ്പടിച്ചു. ഡാനി ടൂർണമെന്റിലെ മികച്ച പ്ലെയറായി.
ചില്ലറക്കാരല്ല മുന്നിൽ
സീറോ ആംഗിളില്‍ നിന്ന് ഇത്തരം മാന്ത്രിക ഗോളുകള്‍ നേടിയവര്‍ ചില്ലറക്കാരല്ല. റൊണാള്‍ഡീഞ്ഞോ ഫ്ളമെംഗോക്ക് വേണ്ടി നേടിയ ഗോളിനോടാണ് ഡാനിയുടെ ഗോളിന് കൂടുതല്‍ സാമ്യം. ലാ ഗാലക്‌സിക്കായി ഡേവിഡ് ബെക്കാമും കോറിന്ത്യന്‍സിനായി റോബര്‍ട്ടോ കാര്‍ലോസും ഡയറക്ട് കോര്‍ണര്‍ കിക്ക് ഗോള്‍ നേടിയെങ്കിലും ഡാനിഷിന്റെ കിക്കിന്റെ ഭംഗി അതില്‍ കാണാനാകില്ല. അടുത്തിടെ വലന്‍സിയക്കെതിരെ റയലിന് വേണ്ടി ജര്‍മന്‍ മിഡ്ഫീല്‍ഡര്‍ ടോണി ക്രൂസും കോര്‍ണറില്‍ നിന്ന് ഡയറക്ട് ഗോളടിച്ചിരുന്നു. അത് പക്ഷേ, ഗോളി പൊസിഷന്‍ ചെയ്യാത്തപ്പോഴായിരുന്നു സൂത്രത്തില്‍ ടോണി ക്രൂസ് കിക്ക് വലയിലാക്കിയത്. ഈ കാരണങ്ങള്‍ കൊണ്ടെല്ലാം നമുക്ക് ഡാനിഷിന്റെ ഗോളിനെ റൊണാള്‍ഡീഞ്ഞോയുടെ മാന്ത്രിക ഗോളിനോട് ചേര്‍ത്ത് വെക്കാം. ഇളം കാലില്‍ നിന്നാണ് ആ ഗോള്‍ പിറന്നതെന്ന് ഓര്‍ക്കണം. റൊണാള്‍ഡീഞ്ഞോ കണ്ടാല്‍ ഡാനിഷിനായിരിക്കും മാര്‍ക്കിടുക!
മെസിയാണ് ഇഷ്ടതാരം
മെസിയാണ് ഡാനിയുടെ ജീവതാളം. ഫുട്‌ബോളിനെ അവന്‍ പ്രണയിക്കുന്നത് മെസിയിലേക്കുള്ള ദൂരം കുറയ്ക്കാനാണ്. മെസിയുടെ ബൂട്ട്, മെസിയുടെ ഷര്‍ട്ട് എല്ലാം ഡാനിഷിന്റെ കലക്ഷനിലുണ്ട്. നടപ്പിലും എടുപ്പിലും അവനൊരു മെസിയാണോ എന്ന് നമുക്ക് തോന്നും. പന്തിന് മേല്‍ അത്രമാത്രം ആധിപത്യമുണ്ട് ഡാനിക്ക്. ഗ്രൗണ്ടില്‍ മറ്റ് ശ്രദ്ധകളില്ല, മെസിയെ പോലെ പന്ത് റീഗെയിന്‍ ചെയ്യാനും പാസ് ചെയ്യാനും ഡ്രിബിള്‍ ചെയ്യാനുമെല്ലാം മിടുക്ക് കാണിക്കുന്ന കുഞ്ഞു താരം. അതുകൊണ്ടു തന്നെ എവിടെ ടൂര്‍ണമെന്റ് കളിച്ചാലും കളിയിലെ താരം മാത്രമല്ല, കാണികളുടെ താരവും ഡാനിയാണ്.
പരിശീലനം പൊടിപൊടിക്കുന്നു
ലയണല്‍ മെസിയെ പോലെയാകണം. കോഴിക്കോട് പ്രസന്റേഷന്‍ സ്‌കൂളിലെ അഞ്ചാം ക്ലാസുകാരന്‍ ഡാനിഷ് പികെയുടെ മനസ് നിറയെ ഈയൊരു ചിന്ത മാത്രമേയുള്ളൂ. ഏത് നേരവും വീട്ടിനകത്ത് ഫുട്‌ബോള്‍ കളിയായപ്പോള്‍ മാധ്യമപ്രവര്‍ത്തകനായ ബാപ്പ ഹാഷിം മകനെ അഞ്ച് വര്‍ഷം മുമ്പ് കെ എഫ് ടി സി ഫുട്‌ബോള്‍ പരിശീലന കേന്ദ്രത്തില്‍ ചേര്‍ത്തു. ചീഫ് കോച്ച് നിയാസ് റഹ്മാന്റെയും പ്രസാദ് വി ഹരിദാസിന്റെയും ശിക്ഷണത്തിലാണ് ഡാനി പന്തിന്റെ ലോകം പരിചയപ്പെട്ടത്. ഇപ്പോള്‍ കോച്ച് ബാസിതിന് കീഴില്‍ സ്‌കില്‍സ് പരിശീലിക്കുന്നു.
ഫുട്ബോളാണ് ജീവിതം
ഡാനിയുടെ ഡയറി നിറയെ ഫുട്‌ബോള്‍ കുറിപ്പുകളാണ്. ഇംഗ്ലീഷ് പ്രീമിയര്‍ ലീഗിലെ ട്രാന്‍സ്ഫറുകളും കളിക്കാരുടെ വിവരങ്ങളും എല്ലാം മന:പാഠം. മെസിയുടെ ചരിത്രം നിന്ന നില്‍പ്പിന് പറഞ്ഞ് തരും. കേരളബ്ലാസ്‌റ്റേഴ്‌സ്, ഗോകുലം കേരള ടീമുകളുടെ താരങ്ങളെ കുറിച്ചെല്ലാം നല്ല അറിവാണ് ഡാനിക്ക്.
നിഖില്‍ ദേവരാജ് സംവിധാനം ചെയ്യുന്ന ആനപ്പറമ്പിലെ വേള്‍ഡ് കപ്പ് എന്ന സിനിമയില്‍ കേന്ദ്ര കഥാപാത്രത്തെ അവതരിപ്പിക്കുന്നത് ഡാനിയാണ്. മെസിയെ സ്വപ്‌നം കണ്ട് കഴിയുന്ന ഏഴ് വയസുകാരന്റെ കഥയാണിത്. ഓഡിഷനില്‍ മികച്ച പ്രകടനത്തോടെ ഡാനി സെലക്ടാവുകയായിരുന്നു. ഈ സിനിമയില്‍ കോര്‍ണര്‍ കിക്ക് ഡറക്ടായി ഗോളാക്കുന്ന സീനുണ്ട്. ഇതിന് വേണ്ടി ഡാനി നിരന്തരം പ്രാക്ടീസ് ചെയ്തിരുന്നു.
ഒന്നും യാദൃശ്ചികമല്ല
മീനങ്ങാടിയില്‍ മകന്റെ കിക്കില്‍ മാജിക് കാണുവാന്‍ ഹാഷിന് മുന്‍കൂട്ടി സാധിച്ചതിന് പിറകിലെ രഹസ്യം കൂടിയാണിത്. സിനിമയിലെ രംഗം ജീവിതത്തില്‍ നടപ്പിലാക്കി മെസിയുടെ ഫാന്‍ ആയ ഡാനി ശരിക്കും വിസ്മയിപ്പിച്ചിരിക്കുകയാണ്. മെയ് 24ന് സിനിമ റിലീസാകും. പ്രസന്റേഷന്‍ സ്‌കൂളില്‍ അഞ്ചാം ക്ലാസ് വിദ്യാര്‍ഥിയാണ് ഡാനിഷ്. പിതാവ് അബു ഹാഷിം കോഴിക്കോട് മലയാള മനോരമയില്‍ ഫോട്ടോഗ്രഫറാണ്. നോവയാണ് അമ്മ. സഹോദരി ആയിഷ. ഇവരെല്ലാം പിതാവ് ഹാഷിമിനെ പോലെ ഡാനിക്ക് എല്ലാ വിധ പ്രോത്സാഹനവും നല്‍കുന്നു.
