ന്യൂഡൽഹി: ശക്തമായ തെരഞ്ഞെടുപ്പ് പോരാട്ടത്തിൽ ഡൽഹിയിൽ ബിജെപി അടിയറവ് പറഞ്ഞതോടെ പരിഹാസവുമായി ശിവസേന നേതാവും മഹാരാഷ്ട്ര മുഖ്യമന്ത്രിയുമായി ഉദ്ധവ് താക്കറെ. ആം ആദ്മി പാർട്ടിയുടെ ചൂലിൻ്റെ ശക്തി അവർ തിരിച്ചറിഞ്ഞു. മുതിർന്ന നേതാക്കളെ തെരഞ്ഞെടുപ്പ് പ്രചാരണത്തിന് ഇറക്കിയിട്ടും അവർക്ക് വിജയിക്കാനായില്ലെന്നും ബിജെപിയുടെ പേരെടുത്ത് പറയാതെ അദ്ദേഹം വിമർശിച്ചു.
മാൻ കി ബാത്തിന് പ്രസക്തിയില്ലെന്ന് തെരഞ്ഞെടുപ്പ് ഫലത്തോടെ വ്യക്തമായി. അരവിന്ദ് കെജ്രിവാളിൻ്റെയും കൂട്ടരുടെയും ജൻ കി ബാത്താണ് ഡൽഹിയിലെ ജനങ്ങൾ സ്വീകരിച്ചത്. രാജ്യം ഭരിക്കുന്നവർ അവരുടെ ശക്തി മുഴുവൻ പുറത്തെടുത്തെങ്കിലും ആം ആദ്മി പാർട്ടിയുടെ ചൂലിൻ്റെ ശക്തിക്ക് മുൻപിൽ പിടിച്ചു നിൽക്കാനായില്ലെന്നും ഉദ്ധവ് പറഞ്ഞു.
തങ്ങളെ എതിർക്കുന്നവരെ രാജ്യദ്രോഹികളാക്കിയും ഒപ്പം നിൽക്കുന്നവരെ രാജ്യസ്‌നേഹികളും ആക്കി തീർക്കുന്നതാണ് അവരുടെ രീതി. കെജ്രിവാളിനെ രാജ്യദ്രോഹിയെന്ന് മുദ്രകുത്താനുള്ള ശ്രമം പോലും നടന്നു. എന്നാൽ തെരഞ്ഞെടുപ്പ് ഫലം പുറത്തുവന്നതോടെ അവരുടെ നീക്കങ്ങളെല്ലാം തകിടം മറിഞ്ഞതായി വ്യക്തമായെന്നും ഉദ്ധവ് താക്കറെ വ്യക്തമാക്കി.
ജനങ്ങളെ ബാധിക്കുന്ന പ്രാദേശിക വിഷയങ്ങൾ അവഗണിച്ച് രാജ്യാന്തര വിഷയങ്ങളിലേക്ക്
ജനശ്രദ്ധതിരിക്കാൻ അവർ ശ്രമം നടത്തിയെങ്കിലും കെജ്രിവാളിൻ്റെ മികവിന് മുന്നിൽ അവർക്ക് പിടിച്ചു നിൽക്കാനായില്ല. മഹാരാഷ്‌ട്രയിലെ ജനങ്ങളുടെയും ശിവസേനയുടെ പേരിൽ ഡൽഹിയിലെ ജനങ്ങളെയും കെജ്രിവാളിനെയും അഭിനന്ദിക്കുന്നു. വികസനത്തിൻ്റെ പാതയിൽ കൂടുതൽ മുന്നോട്ട് പോകാൻ ആം ആദ്‌മിക്ക് കഴിയട്ടെ എന്നും ഉദ്ധവ് പറഞ്ഞു.
