തിരുവനന്തപുരം: റാഗിംഗ് പരാതിയെ തുടർന്ന് കോട്ടൺഹിൽ സ്കൂളിൽ രക്ഷിതാക്കളുടെ പ്രതിഷേധം. മന്ത്രി ആന്‍റണി രാജുവിനെ സ്കൂളിൽ നടന്ന ചടങ്ങിൽ പങ്കെടുക്കുന്നതിൽ നിന്ന് തടഞ്ഞായിരുന്നു പ്രതിഷേധം. അഞ്ചാം ക്ലാസിൽ പഠിക്കുന്ന കുട്ടിയെ പത്താം ക്ലാസിൽ പഠിക്കുന്ന വിദ്യാർത്ഥികൾ റാഗ് ചെയ്തതായി പരാതിയിൽ പറയുന്നു. സംഭവം സ്കൂൾ അധികൃതരെ അറിയിച്ചപ്പോൾ പരാതി വ്യാജമാണെന്നും സ്കൂളിനെ അപകീർത്തിപ്പെടുത്താനുള്ള ശ്രമമാണെന്നും മാതാപിതാക്കൾ പറഞ്ഞു.
കുട്ടികൾ വീട്ടിൽ പറഞ്ഞ കാര്യങ്ങളാണ് പരാതിയിൽ ഉന്നയിച്ചതെന്ന് മാതാപിതാക്കൾ പറയുന്നു. 20 ഓളം രക്ഷിതാക്കൾ സ്കൂളിന് മുന്നിൽ കുത്തിയിരുന്ന് പ്രതിഷേധിച്ചു. ഈ സമയത്താണ് മന്ത്രി ഒരു ചടങ്ങിൽ പങ്കെടുക്കാൻ ഇവിടെ എത്തിയത്. രക്ഷിതാക്കളുടെ പരാതികൾ മന്ത്രി നേരിട്ട് കേട്ടു. റാഗിംഗ് പരാതിയിൽ അടിയന്തര നടപടി വേണമെന്നാണ് മാതാപിതാക്കൾ ആവശ്യപ്പെടുന്നത്. വിഷയത്തിൽ പ്രിൻസിപ്പലുമായും പിടിഐ പ്രസിഡന്‍റുമായും വിദ്യാഭ്യാസ മന്ത്രി ചർച്ച നടത്തിയിരുന്നു.
സംഭവത്തിൽ വിദ്യാഭ്യാസ വകുപ്പ് അന്വേഷണം നടത്തി വരികയാണ്. അതിന് ശേഷം മാത്രം നടപടിയെടുത്താൽ മതിയെന്നാണ് വകുപ്പിന്‍റെ തീരുമാനം. എന്നാൽ കുട്ടികള്‍ക്കുണ്ടായ ദുരനുഭത്തില്‍ അടിയന്തര നടപടി വേണമെന്നാണ് മാതാപിതാക്കൾ ആവശ്യപ്പെടുന്നത്. പരാതിക്ക് പിന്നിൽ ഗൂഢലക്ഷ്യങ്ങളുണ്ടെന്ന് സ്കൂൾ അധികൃതർ പറഞ്ഞു. മുതിര്‍ന്ന കുട്ടികള്‍ തങ്ങളുടെ കുട്ടികളെ സ്റ്റെപ്പില്‍ നിന്ന് തള്ളിയിട്ടുവെന്നും സ്‌കൂള്‍ ബസില്‍ സീറ്റില്‍ ഇരുന്നാല്‍ അതിന് അനുവദിക്കാത്ത സാഹചര്യമുണ്ടെന്നും രക്ഷിതാക്കള്‍ പറയുന്നു.
