കാമ്പസിനെ നടുക്കി ബി.ടെക്ക് വിദ്യാര്‍ഥിനിയുടെ ആത്മഹത്യ; ചാടിയത് അഞ്ചാംനിലയില്‍നിന്ന്
ഹൈദരാബാദ്: ബി.ടെക്ക് വിദ്യാര്‍ഥിനി സര്‍വകലാശാല കാമ്പസിലെ കെട്ടിടത്തില്‍നിന്ന് ചാടി ജീവനൊടുക്കി. ഹൈദരാബാദിന് സമീപം രുദ്രാരമിലെ ഗീതം സര്‍വകലാശാല കാംപസിലാണ് ഒന്നാംവര്‍ഷ ബി.ടെക്ക് വിദ്യാര്‍ഥിനിയായ രേണുശ്രീ(18) കെട്ടിടത്തിന്റെ അഞ്ചാംനിലയില്‍ ചാടി ജീവനൊടുക്കിയത്. മറ്റുവിദ്യാര്‍ഥികള്‍ നോക്കിനില്‍ക്കേയായിരുന്നു സംഭവം.
വെള്ളിയാഴ്ച വൈകീട്ടോടെയാണ് രേണുശ്രീ അഞ്ചാംനിലയിലെ പാരപ്പറ്റില്‍ ഇരിക്കുന്നത് വിദ്യാര്‍ഥികളുടെ ശ്രദ്ധയില്‍പ്പെട്ടത്. കൈയിലുണ്ടായിരുന്ന മൊബൈല്‍ഫോണില്‍ നോക്കിയാണ് പെണ്‍കുട്ടി ഇരുന്നിരുന്നത്. ഇത് ശ്രദ്ധയില്‍പ്പെട്ടതോടെ മറ്റുവിദ്യാര്‍ഥികള്‍ ബഹളമുണ്ടാക്കുകയും അവിടെനിന്ന് മാറാന്‍ ആവശ്യപ്പെടുകയും ചെയ്തു. ഇതിനിടെ, ചില വിദ്യാര്‍ഥികള്‍ താഴെനിന്നും അഞ്ചാംനിലയിലേക്ക് കുതിച്ചു. എന്നാല്‍, നിമിഷങ്ങള്‍ക്കുള്ളില്‍ രേണുശ്രീ അഞ്ചാംനിലയില്‍നിന്ന് ചാടുകയായിരുന്നു. ഗുരുതരമായി പരിക്കേറ്റ വിദ്യാര്‍ഥിനിയെ ഉടന്‍തന്നെ സമീപത്തെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
യെല്ലമ്മബണ്ട സ്വദേശിനിയായ രേണുശ്രീ മൂന്നുമാസം മുന്‍പാണ് സര്‍വകലാശാലയില്‍ കംപ്യൂട്ടര്‍ എന്‍ജിനീയറിങ് കോഴ്‌സിന് ചേര്‍ന്നത്. സംഭവസമയം വിദ്യാര്‍ഥിനിയുടെ കൈയിലുണ്ടായിരുന്ന മൊബൈല്‍ഫോണ്‍ പോലീസ് കസ്റ്റഡിയിലെടുത്തിട്ടുണ്ട്. കെട്ടിടത്തില്‍നിന്ന് ചാടുന്നതിന് മുന്‍പ് ആരെയെങ്കിലും വിളിക്കുകയോ സന്ദേശം അയക്കുകയോ ചെയ്തിട്ടുണ്ടോ എന്നറിയാനാണ് ഫോണ്‍ കസ്റ്റഡിയിലെടുത്തതെന്നും ആത്മഹത്യാക്കുറിപ്പൊന്നും കണ്ടെടുത്തിട്ടില്ലെന്നും പോലീസ് പറഞ്ഞു.
അതിനിടെ, കാംപസിലെ കെട്ടിടത്തില്‍നിന്ന് വിദ്യാര്‍ഥിനി ചാടുന്നതിന്റെ ദൃശ്യങ്ങള്‍ സാമൂഹികമാധ്യമങ്ങളില്‍ പ്രചരിക്കുന്നുണ്ട്. സംഭവസമയം വിദ്യാര്‍ഥികള്‍ പകര്‍ത്തിയ ദൃശ്യങ്ങളാണ് സാമൂഹികമാധ്യമങ്ങളിലൂടെ പുറത്തുവന്നത്.
